O Foro Termal do Eixo Atlántico reuniuse este martes para perfilar os últimos detalles da guía do turismo termal. A publicación procura impulsar a promoción termal das 34 cidades que conforman esta organización ao longo da Eurorrexión Galicia-Norte de Portugal. Na xuntanza participou o deputado provincial de Turismo, Eduardo Vidal Baamonde.
Os recursos salientados para patrocinar o turismo termal son os balnearios Oca Río Pambre de Palas e Augas Santas de Pantón, así como os mananciais de Guitiriz, San Xoán de Lagostelle, Santo Domingo de Pardiñas e Valdovín, en Parga.
Vidal Baamonde subliñou que “dado o alto potencial turístico da auga, é importante que a provincia de Lugo figure nesta promoción conxunta de destinos termais”. Segundo o enviado do goberno provincial, “Lugo ocupa un lugar privilexiado polo seu patrimonio termal, e tamén pola súa longa traxectoria histórica dos usos termais da auga, que se remontan á romanización”.
Lugo Termal
A Deputación de Lugo sitúa entre as prioridades do departamento de Turismo o benestar a través dos recursos termais. Nesa liña, por oitavo ano consecutivo ofrece o Lugo Termal, programa de promoción do turismo mineromedicinal lucense.
Debido ao grande interese que esperta entre a veciñanza de maior idade, na convocatoria deste ano o executivo decidiu duplicar as prazas desta programación, ata case rozar as 1.200.
Cómpre lembrar que, dende a posta en marcha do Lugo Termal, son máis de 5.000 persoas as que se recibiron descontos de máis de 60 euros da Deputación para desfrutar de terapias mineromedicinais nos estabelecementos da provincia.
