Arredor de 400 persoas asistiron este domingo 26 de maio á representación da obra ‘Aquí nunca pasa nada’ no auditorio Gustavo Freire. A compañía TEATRO SIN PAPELES demostrou sobre o escenario ter feito un traballo de documentación excelso e foi quen de sintetizar unha macrocausa verdadeira complexa, como o é a Carioca, encarnándoa nos papeis interpretados por un elenco conformado por dúas únicas actrices. A actuación distinguiuse pola súa capacidade para conectar emocións e transmitir a dureza das realidades que engloba a trama de proxenetismo a un público que rematou visiblemente conmocionado.
Desde a Plataforma contra a Impunidade do Caso Carioca apoian a representación desta obra e coordinan coa compañía de teatro unha acción reivindicativa. Semanas antes da actuación abriron un formulario para facer un berro colectivo con aqueles aspectos que quixese denunciar a título individual ou colectivo quen así o desexase, recibindo numerosas proclamas de organizacións feministas.
Estes lemas foron recollidos en cartolinas amarelas que se distribuiron polo chan e paredes á entrada do auditorio para recibir aos asistentes. Os asistentes podían recoller aquelas cartolinas que fosen do seu agrado. Tamén se reparten numerosas cartolinas amarelas sen nada escrito. Ao remate da obra, as actrices Olga Compte e Luisa Anaya e o director Moisés Mato iniciaron o berro colectivo coas súas proclamas, ao que se uniu o público coas das súas cartolinas. Anunciouse que as cartolinas estarían presentes nunha acción durante o xuízo da peza principal do caso Carioca que terá lugar no próximo mes de xuño, e quen quixese podía escribir novos textos de protesta naquelas cartolinas que non levaban nada escrito e entregalas á plataforma á saída da obra de teatro.
Numerosas persoas se achegaron para trasladar as súas boas críticas á obra, para comunicar que lles causou un gran impacto porque descoñecían a gravidade e profundidade do caso, e mesmo para corroborar que os feitos escenificados ocorreron de verdade porque lles custaba asimilalo. Tamén houbo quen quixo achegar as súas propostas, perspectivas complementarias dende as que abordar o tema, a lembranza de persoas que traballaron investigando a causa, as súas dores.
Consideran que a cifra de asistentes, nunha xornada marcada pola gran manifestación contra Altri que conta con todo o apoio da Plataforma, é unha mostra do interese que suscita o caso Carioca para a cidade na que ocorreron os feitos investigados. Sostén, así mesmo, que unha “maior implicación por parte do Concello de Lugo podería conseguir trasladar a obra a máis persoas”. A compañía denunciou sobre o escenario a existencia de “trabas” para a súa realización. “Cremos que se o acceso fose gratuíto e se fixese unha mellor promoción do evento a asistencia tería sido maior”, afirman.
