O deputado do BNG no Congreso, Néstor Rego, rexistrou unha serie de iniciativas parlamentarias para demandar ao Ministerio de Transportes, Mobilidade e Axenda Urbana que leve a cabo actuacións na N6 ao seu paso pola provincia de Lugo.
En concreto, no tramo entre Baamonde, Rábade e Outeiro de Rei, que concentra “numerosos accidentes”. “Queremos unha rehabilitación integral da vía para impedir que se sigan producindo”, reivindicou Rego, no marco da campaña impulsada polos nacionalistas en Lugo para o arranxo das infraestruturas viarias.
Nun comunicado, o BNG indicou que segundo o último informe da Fundación RACE, o maior punto negro viario de España é o traxecto da N6 nesas localidades, entre os puntos quilométricos 517 e 528.
“Queremos coñecer se o Ministerio ten pensado realizar obras neste tramo que transcorre entre os núcleos de Baamonde, Rábade e Outeiro de Rei e, se existe esta previsión, en que fase da tramitación administrativa atópanse as actuacións“, engadiu Rego.
