A Garda Civil imputou en calidade de investigados a catro veciños do municipio lucense de Vilalba por tentar subtraer un inodoro dun hotel pechado de Pobra de San Xiao. Segundo informou o Instituto Armado, están investigado como supostos autores dun delito de furto en grao de tentativa.

Os feitos sucederon na madrugada do pasado día 6 no interior dun hotel que actualmente se atopa pechado e os infractores, con idades comprendidas entre os 22 e 57 anos, foron sorprendidos ‘in situ’ polos axentes.

Nese momento, portaban varias ferramentas que foron, supostamente, utilizadas para tentar levar un sanitario wc que se atopaba instalado nunha das habitacións.

A Garda Civil de Lugo detallou que as dilixencias policiais foron remitidas á autoridade xudicial.