O Corpo Nacional de Policía investiga o que, de confirmarse, sería o terceiro caso de abuso sexual con pérdida de consciencia inducida da pasada fin de semana en Lugo. Trátase novamente dunha muller xove que se atopaba de festa, na noite domingo, e que apareceu nun coche acompañada dun coñecido e outra persoa, sen lembrar como chegara ata alí.
Segundo o relato que presentou aos axentes, a rapaza atopábase de festa cuns amigos polo ensanche da cidade, nun pub da rúa Tui. Ao parecer, perdeu a consciencia entre as 05.00 horas e as 13.00 horas do luns, cando espertou no coche canda a dúas persoas. Porén, non foi ata as 18.00 horas que marchou ao domicilio que comparte coa súa parella, comprobando que non levaba a roupa interior.
A Policía tenta esclarecer se existiu agresión sexual, dado que a moza “non sabe o que pasou”. Os investigadores constataron, a partir das probas preliminares, unha taxa considerable de alcol e presenza de substancias estupefacientes.