Catro persoas resultaron feridos en Lugo este mércores ao saírse da estrada o coche no que viaxaban e chocar contra un noiro de terra e un letreiro indicador.
Segundo informou a Policía Local, esta pasada noite un equipo de Atestados do Corpo da Policía Local de Lugo desprazouse ao Camiño do Souto, onde se produciu o accidente de circulación. Polo choque, os catro pasaxeiros do vehículo resultaron feridos e foron trasladados ao HULA en dúas ambulancias do 061 para a súa atención médica.
INTOXICACIÓNS ETÍLICAS
Por outra banda, con motivo da celebración da festa da Carballeira, a Policía Local tivo que intervir en dous auxilios por intoxicación etílica.
Ao primeiro mozo atopárono tirado no chan cunha forte embriaguez, semi inconsciente e sen reaccionar ás preguntas que se lle facían. Por iso, colocárono en posición de seguridade e chamaron a unha ambulancia do 061 para o seu traslado ao HULA. O segundo atopábase en parecidas circunstancias, tamén no chan, semi inconsciente e sen resposta, e tamén foi trasladado ao HULA.
