Dúas persoas resultaron feridas este sábado en Lugo ao saírse da vía o vehículo no que viaxaban e chocar este contra unha árbore. Segundo informa a Policía Local de Lugo, axentes desprazáronse na tarde deste sábado a Rolda de Fingoi, onde se produciu o accidente, ocupado por dúas persoas, ademais do condutor.
Aínda que resultaron feridos, non foron de gravidade e foron trasladados a un centro médico por unha ambulancia do 061. O condutor foi sometido ás probas de alcol e drogas, con resultado negativo en ambas.
O día anterior, venres 1 de marzo, os axentes da Policía Local tamén interviñeron noutro accidente de circulación. De madrugada, un equipo de atestados desprazábase á rúa Lamas de Prado, onde observaron a dous turismos con danos de consideración. Unha testemuña informou de que a causante fora unha furgoneta que se deu á fuga. Ao pouco tempo, presentouse o condutor da furgoneta e confesou ser o causante dos danos.
ALTERCADO NA VÍA PÚBLICA
Por outra banda, durante a noite do sábado, unha patrulla do Grupo Operativo Nocturno da Policía Local de Lugo é comisionada pola Sala do 092 para que acuda a Ronda das Fontiñas, onde un home denunciou ser agredido por outro, que o seguía a pé. Informaba ademais que o presunto agresor escondeuse nun edificio.
Tal e como narra o denunciante, circulaba co seu vehículo pola citada rúa cando, ao deterse nun paso para peóns, un home recriminoulle non deterse. O denunciante baixou do coche para indicarlle que se detivo con “moita antelación” e é entón cando o outro propinoulle un golpe na fronte.
