A Deputación de Lugo activou este domingo un operativo para facer fronte aos efectos da neve e das choivas nas estradas provinciais de 10 concellos afectados. Segundo informou o ente provincial, na tarde desta xornada quedou aberta a totalidade da rede viaria da provincia tras unha mañá de intenso traballo.
Os concellos máis afectados pola neve foron os de Cervantes, Pedrafita do Cebreiro, Becerreá, Baleira, Triacastela, Folgoso do Courel, A Fonsagrada, Navia de Suarna e Quiroga. A Garda Civil, á primeira hora deste domingo, tamén tivo que intervir, por motivo da neve, atendendo aos peregrinos que saíron de O Cebreiro a Triacastela.
Pola súa banda, en Mondoñedo, á altura da parroquia de Santa María Maior, a LU-P-3103 afundiuse polas intensas choivas e a Deputación traballa para solucionar a incidencia no menor tempo posible.
O operativo da institución provincial despregou a 48 operarios e 32 máquinas e vehículos, dispondo dos 12 silos de sal abastecidos con 35 toneladas cada un.
