A Audiencia Provincial de Lugo acolleu este xoves o xuízo contra un home de 76 anos acusado de abusar sexualmente e de maneira continuada da súa neta, menor de idade e con discapacidade intelectual, no que a Fiscalía se ratificou na súa petición de cinco anos de cárcere para o imputado e no que o presunto autor dos feitos negou os cargos tachándoos de “invencións”. A vista, suspendida a semana pasada por uns problemas no audio da declaración da vítima, de 13 anos, celebrouse este xoves e contou cos testemuños do acusado –avó paterno da menor– e dos proxenitores da nena, divorciados en réxime de custodia compartida.
Os feitos xulgados tiveron lugar, de acordo ao recolleito no escrito fiscal, “en varias ocasións” e “ata mediados de abril de 2022” no marco das visitas periódicas que a nena realizaba os fins de semana ao domicilio do seu pai, sito na cidade de Lugo, que compartía piso co avó da menor. Durante unha das visitas, acontecida en abril de 2022, o acusado realizaría tocamentos á menor, sostiveron durante o xuízo a fiscal e o letrado da acusación particular, na cociña da vivenda á vista do seu pai e dun veciño que se atopaba nese momento no domicilio.
O pai da nena, que corroborou durante a vista presenciar a escena e pór os feitos en coñecemento da súa ex muller –que foi a encargada de cursar a denuncia– asegurou ante a xuíza que os tocamentos realizados polo seu pai –o avó da menor– non foron “un simple rozamento” senón unha manobra consistente en “apalpar” na que percibiu, recoñeceu, “ánimo sexual”. “Cando pasou ese episodio a nena díxolle: ‘Déixame xa’, ‘para xa'”, declarou.
A nai da nena, que tamén prestou declaración este xoves na Audiencia Provincial de Lugo, asegurou que a menor, que recibe asistencia psicolóxica desde o sucedido, non quere realizar visitas á casa o pai “por medo ao avó”.
“SON TODO INVENCIÓNS”
O presunto autor do delito, que foi o primeiro en ofrecer o seu testemuño ante a xuíza, negou tajantemente a súa autoría durante a vista e acusou ao seu fillo de “invencións” á hora de formular a acusación e a ambos os proxenitores de “manipular” á nena.
“Pódenme meter no cárcere ou o que sexa pero eu non toquei á miña neta xamais. Se a toquei algunha vez foi xogando. Son todo invencións. Que ánimo vou ter eu cunha nena discapacitada? Estou tolo ou que?”, manifestou. O letrado da defensa, que chamou a atención sobre o feito de que non existe rexistro de mensaxería capaz de probar que o pai advertise a través de WhatsApp á nai do sucedido aquela tarde na cociña, puxo o foco sobre a mala relación que existe entre o imputado e os dous proxenitores e solicitou a libre absolución para o seu cliente.
A Fiscalía, pola súa banda, ratificouse na súa solicitude dunha pena de prisión de cinco anos para o acusado, para o que pediu ademais a privación de contacto e achegamento á nena por un período de oito anos e a obrigación de someterse a un programa formativo de educación sexual por un presunto delito continuado de abuso sexual a menor de idade.
A acusación particular elevou a seis os anos de prisión solicitados, a dez o período de afastamento demandado e fixou en 5000 euros a indemnización para a menor polos danos morais provocados. O xuízo quedou visto para sentenza.
