O Festival de poesía As Lupercais celebrará a súa terceira edición, en Lugo, durante os sábados 2 e 9 de marzo. A cita deste ano comezará o primeiro día coa inauguración da exposición de debuxos da artista Paula Luís na galería Solaina, á cal seguirá un recital de poesía a cargo da propia Paula Luís e o poeta asturiano Diego Solís.

O sábado 9 será o día central do festival coa intervención de doce poetas en tres sesións. Abrirán a xornada, ás 12.30 horas, Branca Novoneyra, Eva Teixeiro, Jesús Castro Yáñez e Brais García, estando este último acompañado á guitarra por Rafa Fernández.

Pola tarde, a primeira lectura será ás 18.30, co poeta portugués José Rui Teixeira, seguido de Almudena Otero Villena, Ánxela Gracián e o xienense Carlos Catena. Para rematar, ás 20.00 horas, contará con Oriana Méndez, María Reimóndez o barcelonés Unai Velasco e a Cordobesa María Sánchez. Xuntaranse, así, voces de Lugo con voces doutros puntos do país e da península.

Con esta terceira edición, o Festival das Lupercais quere consolidarse definitivamente coma un evento de referencia, un punto de encontro de mans dadas coas participantes e co público.