O Concello de Lugo convocou un pleno extraordinario para o venres, 12 de xaneiro, ás 9,00 horas, no que a alcaldesa, Lara Méndez, formalizará a súa renuncia ao cargo, requisito indispensable para concorrer nas listas ás eleccións ao Parlamento de Galicia do próximo 18 de febreiro.
A data límite para rexistrar as candidaturas é o vindeiro luns 15 de xaneiro, polo que antes de levar a cabo este trámite, é preciso formalizar todas as renuncias dos postos que se consideran inelegibles, como son os alcaldes ou altos cargos da Xunta, entre outros postos.
O concello informou a través do seu gabinete de prensa da convocatoria deste pleno extraordinario, no que Lara Méndez fará efectiva a súa renuncia como alcaldesa despois de que ela mesma este luns confirmase a súa inclusión nas listas socialistas como número dous de José Ramón Gómez Besteiro e explicase en rolda de prensa os seus argumentos.
Concretamente, a alcaldesa de Lugo, dixo que a decisión de dar este paso é porque “neste momento pode facer un labor importante para Lugo desde outro ámbito”. Os meus obxectivos van seguir sendo os mesmos”, ha manifestou ante a prensa.
Méndez, á fronte do Executivo municipal desde o ano 2015, asegurou que a decisión chegou tras manter “conversacións” co candidato do PSdeG á presidencia da Xunta e consciente de que o seu proxecto constitúe unha alternativa ao Goberno “cortoplacista” de Alfonso Rueda que, precisou, está “a asfixiar” a cidade das Murallas.
Pola súa banda, o socio de coalición, Rubén Arroxo (BNG), expresou que “o goberno municipal mantense co acordo que temos desde xuño de 2023”.
“E desde o BNG imos seguir traballando no proxecto de cambio que levamos facendo estes catro anos e medio”, dixo, tras desexarlle a Méndez sorte na súa nova etapa. “Poden cambiar as persoas, pero os proxectos seguen en pé”, afirmou.
CRÍTICAS DE CANDIA
Este martes, a portavoz municipal do PP, Elena Candia, cualificou este paso como unha “enorme irresponsabilidade” e puxo o acento en que leva a cabo “sen saber quen vai substituíla”. Ademais, acusou á aínda rexedora lucense de deixar tras a súa marcha “unha cidade caótica e empobrecida”.
“A herdanza que deixa Lara Méndez é profundamente decepcionante”, comezou dicindo Candia, que cualificou como unha “estratexia electoral” as “continuas confrontacións” da rexedora “coas administracións” e asegurou que a súa marcha denota “improvisación e problemas internos”.