A alcaldesa de Lugo, Lara Méndez, anunciou este luns a súa decisión de renunciar á alcaldía da cidade para concorrer nas listas do PSdeG aos comicios do 18 de febreiro forzada, dixo, por un adianto electoral que “obedece a criterios partidistas” e para formar parte do proxecto “gañador, urxente e necesario” de José Ramón Gómez Besteiro.
O anuncio produciuse no marco dunha rolda de prensa convocada na sede da Agrupación Local do PSOE, na que a alcaldesa estivo arroupada por todos os concelleiros do seu partido, e algunhas horas antes da celebración da reunión da executiva socialista provincial.
“O adianto de eleccións non o decidimos nós, obedece a uns criterios partidistas e electoralistas, non obedece ás necesidades de Galicia. Dou o paso porque neste momento podo facer un labor importante para Lugo desde outro ámbito. Os meus obxectivos van seguir sendo os mesmos“, manifestou.
Méndez, á fronte do Executivo municipal desde o ano 2015, asegurou tomar a decisión –que chega tras consumirse tan só oito meses do seu terceiro mandato— tras manter “conversacións” co candidato do PSdeG á presidencia da Xunta e consciente de que o seu proxecto constitúe unha alternativa ao Goberno “cortoplacista” de Rueda que, precisou, está “a asfixiar” Lugo.
“As políticas do PP na Xunta de Galicia levan moitos anos prexudicando a esta cidade e a esta comunidade autónoma. Nestes 15 anos non avanzamos absolutamente nada”, manifestou Lara Méndez, para acto seguido defender a candidatura “gañadora” de Besteiro como a única vía posible “para poder seguir avanzando e transformando Galicia”.
NOVE ANOS NO GOBERNO
A aínda alcaldesa de Lugo, que se comprometeu durante a súa intervención a reparar algunhas das “débedas históricas” da Xunta coa cidade –“como o Plan Paradai, a Rolda Leste, o cuartel de San Fernando ou a zona de baño pública”, enumerou– renunciará ao longo dos próximos días á alcaldía e á súa acta de concelleira.
Ao facelo, a que foi a primeira muller alcaldesa na historia de Lugo tras 12 anos traballando como concelleira en Cervo e oito ostentando o cargo de vicepresidenta da Deputación Provincial, porá fin a case nove anos de goberno á fronte do Executivo municipal.
“Durante todos estes anos prioricei esta cidade por encima de todo, mesmo da familia, e o meu compromiso é o de seguir traballando por Lugo para desbloquear desde o Parlamento os grandes proxectos desta cidade”, asegurou Lara Méndez, visiblemente emocionada.
UNHA SUBSTITUCIÓN “CONTINUISTA”
A identidade da persoa encargada de tomar a substitución de Lara Méndez á fronte do Concello de Lugo é aínda unha incógnita, aínda que os nomes da concelleira de Urbanismo e portavoz socialista, Paula Alvarellos; e do deputado provincial e concelleiro de Medio Ambiente e Zona Rural, Miguel Fernández –número dous da lista– parten con clara vantaxe.
CRÍTICAS DO PPdeG
Pola súa banda, o PP de Lugo acusou á alcaldesa de Lugo, Lara Méndez, de “antepor as súas metas persoais e políticas” despois de que anunciase que abandonará o bastón de mando que ostenta desde 2015 para ser o número dous da lista do PSOE por Lugo nas próximas eleccións autonómicas do 18 de febreiro.
Nun comunicado emitido este luns, os populares lugueses manifestan o seu respecto á decisión de Méndez de abandonar a política local, o que interpretan como unha mostra de que pretendía usar o concello “como trampolín para facerlle oposición á Xunta no canto de gobernar para os veciños de Lugo”.
