Un coche patrulla da Policía Nacional viuse involucrado nun aparatoso accidente na Avenida da Coruña ao bater contra un turismo. Como consecuencia do choque, dous axentes e dous ocupantes do outro vehículo resultaron feridos. Un dos axentes precisou asistencia sanitaria no lugar e foi despois trasladado.
A colisión sucedeu contra as dez da noite deste martes, á altura da entrada ao parque da Milagrosa, cando a unidade da Policía Nacional se dirixía ao centro do barrio por un aviso de incendio. O zeta, como se coñece a estes coches patrullas no argot policial, quedou seriamente danado no frontal.
Incendio na Milagrosa
O aviso inicial debeuse ao incendio dun coche a escasa distancia do lugar do accidente. O motor dun vehículo particular comezou a arder a carón do centro de saúde da Milagrosa, obrigando a comparecer aos Bombeiros de Lugo e outro compoñente da Policía Nacional.
O lume foi rapidamente sufocado e minutos despois os propietarios puideron retirar os enseres persoais.
