O Estado de Israel segue cometendo un xenocidio en Gaza e a plataforma Lugo por Palestina pronúnciase sobre o encontro de baloncesto que enfronta mañá ao CB Breogán contra o equipo israelí Hapoel Holon B.C no partido da Champions. “Neste contexto, é inevitable que a presenza deste club supere o ámbito estritamente deportivo”, aseguran nun comunicado.
Lembran que no partido de ida, disputado na capital de Letonia, o equipo israelí fixo uso propagandístico coas cámaras de televisión, e unha bandeira xigante do Estado de Israel que adornou a bancada, en cuxos asentos se distribuíron fotografías das persoas retidas por Hamás desde o 7 de outubro. Ademais, os xogadores portaban camisetas reivindicativas e na bancada puideron verse persoas afeccionadas do equipo con bandeiras israelís a pesar de tratarse, teoricamente, dun partido a porta pechada.
“Él lexítimo que o equipo técnico e os xogadores do Hapoel Holon reivindiquen o regreso a casa dos seus compatriotas, pero é absolutamente ilexítimo que o fagan aproveitando un partido de baloncesto contra un equipo estranxeiro”, apuntan desde Lugo por Palestina que condena que no actual contexto a FIBA (Federación Internacional de Baloncesto) permita a participación de equipos israelís na BCL e Euroligue. Ademáis lamentan que a a súa presenza altere a “convivencia pacífica” de Lugo que vai sufrir “unha blindaxe policial” por mor do encontro deportivo.
Ante isto, Lugo por Palestina demanda ao goberno central e ás autoridades deportivas, que promovan nos organismos internacionais a prohibición aos equipos israelís de participar nas súas competicións, especialmente as europeas, mentres Israel continúe realizando o xenocidio contra o pobo palestino.
