A Policía Local de Lugo detivo o mércores a un pai, por un suposto delito de malos tratos no ámbito familiar, despois de darlle unha patada e dúas labazadas ao seu fillo “porque tirara un iogur”.
Segundo informa o corpo municipal, ocorreu pola tarde cando os axentes foron requiridos a través do 092 para acudir á confluencia entre as rúas Río Lor e Quiroga,porque “un home agredira a un neno pequeno e ausentouse do lugar conducindo un vehículo”, do que achegaron o número de matrícula.
Así, tras consultar a súa base de datos, a Policía Local compareceu no domicilio do titular do coche. Alí recibiunos a nai do menor, quen explicou que estaba co seu pai porque o levou a actividades extraescolares. Os axentes acudiron ao lugar onde se desenvolven estas e entrevistáronse cunha das responsables, quen explicou que, cando o neno entrou na actividade, relatoulle que o seu proxenitor “lle pegou porque tirara un iogur”.
Ademais, un das testemuñas detallou que o home dera ao neno unha patada e dúas labazadas. Con toda esta información, a Policía Local procedeu á detención do pai por un suposto delito de malos tratos no ámbito familiar, instruíndose as correspondentes dilixencias para o xulgado. O home recoñeceu que pegara ao seu fillo porque “se puxo nervioso”.
