Unha vivenda de dúas plantas situada no municipio de Cospeito resultou destruída debido a un incendio rexistrado nas últimas horas, no que non se produciron danos persoais, segundo informou o CIAE 112 Galicia. A alerta saltaba a pasada medianoite, cando unha persoa contactaba con Emerxencias para informar de que se estaba producindo un incendio nunha casa de dúas plantas, no lugar de Muíños, en Piñeiro. A persoa que chamaba explicaba que non había persoas no interior do inmoble, pero cría que si había animais nun anexo.
O 112 informou os bombeiros de Vilalba, Garda Civil, GES de Friol, así como persoal do Concello e do servizo provincial de extinción de incendios, por se fose necesaria a súa intervención.Os bombeiros lograron extinguir as chamas, pero o lume xa calcinara por completo a vivenda. Con todo, os efectivos lograron salvar aos animais que se atopaban na parte traseira da casa.
