A Policía Local de Lugo interceptou a un condutor que circulaba nunha motocicleta sen seguro obrigatorio que, ademais, deu positivo en consumo de drogas, en concreto en cocaína.
A patrulla da Policía da Unidade Territorial de Barrio parouno o mércores na rúa Ourense e abriulle un expediente sancionador con multa de 1.000 euros e a retirada de seis puntos do permiso de condución. Do mesmo xeito, impúxolle multas de 1.250 euros por carecer de seguro obrigatorio e 200 euros porque non presentaba a ITV no prazo debido.
Por outra banda, na madrugada deste xoves, os axentes déronlle o alto a un vehículo na rolda da Muralla comprobando que o seu condutor presentaba signos de embriaguez.
Como resultado das probas deu positivo en 0,55 miligramos por litro, polo que se abriu un expediente sancionador con multa de 1.000 euros e a retirada de seis puntos do permiso de condución.
INSPECCIÓNS
Tamén na madrugada do día 26, efectivos do Grupo Operativo Nocturno realizaron unha inspección a un local de lecer nocturno na rúa Marina Española por exceder o límite de horario establecido procedendo ao seu desaloxo e levantando unha acta de denuncia por infracción da normativa.
Ademais esta noite, os axentes procederon á identificación dun home de 44 anos que estaba “a gritar e golpeando escaparates” na avenida da Coruña, o cal foi “auxiliado” e trasladado ao HULA en ambulancia. Igual que unha persoa á que asistiron tras inxerir “pastillas e alcol”.