A Garda Civil de Lugo identificou ao longo da pasada semana a un total de nove condutores que deron positivo nas probas de alcol ou drogas realizadas en distintos puntos da provincia e que foron imputados en calidade de investigados.
En concreto, o luns 25 de setembro identificaron a un condutor que circulaba ebrio pola N-6, á altura de Pedrafita do Cebreiro. O home quintuplicaba a taxa máxima permitida.
Ao día seguinte, na estrada N-540 ao seu paso por Chantada, os axentes identificaron a un condutor que triplicaba a taxa máxima de alcol permitida.
Na madrugada do venres, a Garda Civil tivo coñecemento dun sinistro viario na estrada LU-621 en Láncara, no que un vehículo se saíu da calzada e chocado contra un muro. Unha vez no punto, os axentes prestaron auxilio á súa condutora, que deu positivo en alcol e cocaína.
Esa mesma xornada, os axentes interviñeron noutro accidente de circulación na CG-2.2, en Bóveda. Como consecuencia do sinistro, resultaron feridos de diversa consideración os tres condutores e únicos ocupantes dos vehículos implicados, un deles positivo e consumo de alcol.
Na madrugada do sábado 30, os axentes identificaron tamén na N-6, neste caso no Corgo, ao condutor dun turismo que triplicaba a taxa máxima permitida de alcol. Na mesma xornada, en Ribadeo, outra intervención nun accidente deu como resultado un condutor que cuadriplicaba a taxa máxima de consumo de alcol permitido. O 1 de outubro, os axentes identificaron a outro condutor positivo en alcoholemia mentres circulaba pola LU-530 en Lugo.
Finalmente, a Garda Civil acudiu na madrugada do día 2 de outubro a un accidente de circulación rexistrado na LU-862 en Viveiro, consistente nunha saída de vía con posterior envorco.
O condutor implicado no suceso resultou ileso mais negouse a someterse á proba de detección alcohólica, aínda que presentaba síntomas evidentes de acharse baixo a súa influencia; por este motivo instruíronse dilixencias remitidas ao Xulgado de Instrución 2 de Viveiro, pola suposta comisión de dous delitos contra a seguridade viaria, ao negarse a efectuar as probas de detección do grao de impregnación alcohólica e pola condución dun vehículo a motor con síntomas evidentes de atoparse baixo a influencia de bebidas alcohólicas.
