A alcaldesa de Lugo, Lara Méndez, e os propietarios de tres parcelas en Recimil asinaron na mañá deste mércores a cesión dos terreos necesarios para a supresión dun paso a nivel nesta localidade, no cal recentemente faleceron dous mozos.

Así, o goberno local asume temporalmente a titularidade das propiedades, que serán postas de inmediato a disposición de Adif para que o organismo estatal poida iniciar os traballos de mellora da seguridade na zona.

A firma desta cesión temporal foi a fórmula administrativa elixida para acurtar ao máximo os prazos legais e poder así iniciar a construción dun camiño paralelo á vía, que conectará cun paso inferior situado a 300 metros, tal e como se acordou no encontro a tres bandas entre o Concello, o Ministerio de Transportes e os representantes veciñais o pasado 21 de agosto.

A rexedora agradeceu a “boa predisposición” dos propietarios e a colaboración dos veciños da parroquia, grazas aos cales o acordo viu luz verde nunha semana.

“Desde o goberno local, reiteramos o noso compromiso cos veciños na procura dunha maior seguridade da vía ferroviaria neste punto do noso municipio”, manifestou a alcaldesa, quen dixo que o obxectivo común é “lograr canto antes que o paso poida ser suprimido e que, ao tempo, exista unha alternativa de tránsito que impida o illamento dos habitantes de Recimil e Coeo”.

“Por iso ofrecémonos desde o primeiro momento a facilitar a consecución dunha solución co respaldo veciñal”, apuntou Méndez.

PECHE DO PASO A NIVEL

O peche anticipado do paso a nivel 424/010 levará a construción, por parte de Adif, dun camiño provisional paralelo á vía pola marxe dereita, que conectará este paso a nivel cun inferior situado a 300 metros en dirección norte e que conta coa altura necesaria para o tránsito de vehículos de grandes dimensións.

Esta solución, acordada entre os representantes veciñais e os técnicos do organismo estatal a pasada semana, requirirá pór a disposición de Adif uns cen metros lineais de terreo, xestión para que o goberno local mostrou “a súa máxima colaboración”.

Unha vez cumprido este trámite, estímase que a realización deste camiño provisional poida concluír nun prazo aproximado de dous meses, tal e como informaron os responsables do Adif, segundo explica o Concello de Lugo.