Cinco persoas foron detidas nunha operación conxunta entre Policía Nacional e Garda Civil que permitiu desarticular un punto de venda de drogas que estaba controlado por un dos clans familiares dedicados ao tráfico de estupefacientes “máis activos” da cidade de Lugo.
A investigación contra este grupo estaba en marcha desde 2022 e derivou nos arrestos e rexistros levados a cabo os días 22 e 23 deste mes de agosto, segundo informou este venres a Policía Nacional nun comunicado.
Ademais da detención de cinco persoas, as forzas da orde procederon ao rexistro de dúas vivendas situadas na capital luguesa, onde se incautaron de material para a manipulación de droga, 60 gramos de cocaína, 60 gramos de haxix e outros 30 de marihuana.
Policía e Garda Civil dan por desarticulado este clan familiar, que consideran un dos “máis activos” na venda polo miúdo de droga da cidade de Lugo.
