O PP de Lugo tachou de “oportunismo” as declaracións realizadas este xoves polo goberno local en relación á praia fluvial do Miño e afirmou que a cidade non ten este servizo porque a alcaldesa, Lara Méndez, “desistiu dela” no seu momento.
Con iso, os populares cargaron contra as palabras da tenente de alcaldesa, que acusou desta situación ao “bloqueo” por parte da Xunta.
Fronte a iso, o PP local di que hai unha resolución do ano 2016 da CHMS na que se indica que “se declara desistida a solicitude para autorizar a zona de baño no Miño” porque na Deputación de Lugo, onde Lara Méndez era a vicepresidenta, “en cinco anos non achegou a documentación que se lle requiría para este proxecto”.
“Lara Méndez non é crible cando fala da praia fluvial cuxo partido, con responsabilidades no Concello e na Deputación, leva prometendo esta praia desde o ano 2011. Se os lucenses estamos a pasar outro verán máis sen poder gozar dunha zona de baño público no Miño é pola improvisación e a torpeza de socialistas e nacionalistas”, resolveron os populares.
TALANTE PARA ENCAIXAR AS CRÍTICAS
Por outra parte, os ‘populares’ suxiren ao goberno local de Lara Méndez, que teña “máis talante á hora de encaixar as críticas” e insiste en que o Concello debe ser “áxil e dinámico” á hora de aprobar expedientes e licenzas.
É un novo comunicado dos populares despois de que na mañá do mércores censurasen a decisión da alcaldesa de suspender a reunión semanal da xunta de goberno local –que conforman PSdeG e BNG– porque só figuraba un asunto na orde do día.
Posteriormente, o goberno municipal contestaba desmentindo a “parálise” no Concello con datos –tramitou 157 licenzas entre xullo e agosto por case 10 millóns de euros en total– e acusaba á portavoz do PP, Elena Candia, de “populismo” e de non respectar “o dereito dos traballadores municipais a gozar das súas vacacións”.
Xa este xoves, os populares subliñan a súa “oposición responsable” consistente en “denunciar cuestións que redundan no funcionamento do Concello”. Así, reiteran a súa censura á suspensión da xunta de goberno local: “Queremos que se faga o que queda sen facer e para iso precisamos un Concello áxil e dinámico”.
Neste contexto, o PP acusa o equipo de Méndez de “maquillar cifras”, ao contabilizar como trámites urbanísticos cuestións como comunicacións previas de obras. Por iso, o grupo municipal que lidera Candia aclara que no que vai de verán “resolvéronse 39 licenzas de obra maior”, unha “cantidade ridícula” cando hai “case 800 que están gardadas nun caixón”.
