Por terceira vez no que vai de lexislatura, o alcalde de Outeiro de Rei evitou convocar o pleno ordinario. Sobre práctica recorrente de José Pardo, do Partido Popular, deberá pronunciarse a Valedora do Pobo logo da petición de amparo asinada polos tres grupos da oposición, que consideran que esta actitude violenta o dereito fundamental dos membros da corporación municipal de presentar propostas e fiscalizar o labor da alcaldía.

O escrito dirixido á Valedora está impulsado polo Bloque Nacionalista Galego, Foro Lugo Independente e Partido Socialista. As tres forzas da oposición denuncian que, como acontecera en setembro de 2016 e abril de 2017, o rexedor declinou celebrar o pleno  ordinario correspondente a outubro sen contactar co resto de grupos.

A trascendencia desta negativa débese a que o pleno ordinario permite aos representantes electos lanzar iniciativas propias e examinar as funcións do goberno local. Cando a sesión plenaria ten carácter extraordinario, a alcaldía –neste caso, o Partido Popular– ten a potestade de ditar a orde do día. A oposición mantén que sempre amosou disposición para cambiar as datas dos plenos.

Así, a petición asinada polos voceiros Xosé Ferreiro (BNG), Malena Ron (FLI) e Luísa Lombao (PSdeG) manifesta á Valedora a necesidade de celebrar os plenos ordinarios. De continuar o bloqueo, din contemplar outras actuacións, mesmo a convocatoria dun pleno extraordinario que na orde do día inclúa as iniciativas da oposición.

Nun comunicado, os tres grupos asinantes afirman que “o alcalde persegue con isto que a oposición non poida facer o traballo que a cidadanía lle encargou cos seus votos”. “Está a vulnerar dun xeito grave os dereitos das concelleiras e concelleiros electos”, conclúen.