A sección segunda da Audiencia Provincial de Lugo condenou a tres anos de cárcere e ao pago dunha multa de 4.000 euros, como autor dun delito contra a saúde pública, na modalidade de drogas que causan grave dano á saúde, coa atenuante de grave adicción ás drogas, a un veciño da cidade por vender sustancias estupefacientes no seu domicilio.

Na sentenza, o tribunal considera probado que o acusado, acompañado por outras persoas que xa foron condenadas, dirixiuse a Ferrol para proverse de droga, “en concreto, a un poboado que existe na devandita localidade”.

O 9 de setembro de 2020, a policía interceptou o vehículo no que regresaban de Ferrol, en cuxo interior detectaron sustancias estupefacientes.

Os xuíces consideran probado que no momento dos feitos o acusado era drogodependente de longa evolución, “o que afectaba as súas capacidades mentais”, así como que tiña na súa poder as drogas, ademais de para o seu consumo, “para vendelas, favorecendo o consumo doutras persoas e lucrarse así na revenda, maneira na que tamén se procuraba os medios para atender á súa grave adicción”.

O fallo non é firme, polo que contra el cabe presentar recurso ante o Tribunal Superior de Xustiza de Galicia (TSXG).