A portavoz nacional do BNG, Ana Pontón, advertiu de que Galicia “non pode seguir esperando nin aguantando tanta discriminación”, polo que ten que “facerse respectar en Madrid”. “O voto do respecto a Galicia é o voto ao BNG”, proclamou.
Nun acto de presentación de candidatos en Lugo, Pontón destacou que a presenza do BNG en Madrid é “para traballar por este país”. “E demostrámolo nesta lexislatura, na que un deputado do BNG foi máis útil que 22 das forzas estatais”, salientou.
Así, recoñeceu que “cando puido”, o BNG “condicionou a axenda do Estado para facer que realmente os problemas de Galicia empezasen a ter solución”.
Así mesmo, na presentación dos candidatos pola provincia de Lugo, que encabeza Daniel Castro, Pontón incidiu en que a formación nacionalista é a “única forza que garante” que porá os intereses de Galicia “por diante” de calquera outro.
“Que podemos ir coas mans libres ao Congreso dos Deputados porque non recibimos ordes de Madrid, estamos ao servizo da sociedade galega e esta é a garantía de que os problemas que ten este país escóitense e póñanse en marcha soluciones“, remarcou Pontón, quen incidiu en que o próximo 23 de xullo a cidadanía ten co seu voto “o poder de cambiar as cousas”.
