O primeiro Arde Lucus como Festa de Interese Turístico Internacional finaliza cun balance “tremendamente positivo” e cunha ocupación hoteleira que chegou ao 80% durante o venres e superou o 90% o sábado.
A alcaldesa de Lugo, Lara Méndez, fixo unha valoración “tremendamente positiva”, que cualificou de éxito a pesar das altas temperaturas destes últimos días, que “en determinados momentos da xornada, puideron rebaixar a presenza do público nas rúas”.
Ademais, Méndez remarcou que esta festividade finaliza deixándoos “cun gran sabor de boca” tanto no referente á animación e dinamización das rúas como na consecuencia que isto ten “a nivel revulsivo económico”, xa que a ocupación hoteleira e hostaleira “foi moi boa”.
OCUPACIÓN HOTELEIRA NO FIN DE SEMANA
Así, nun comunicado, a Asociación Provincial de Empresarios de Hostalaría e Turismo de Lugo (Apehl) publicou os datos da ocupación hoteleira durante o fin de semana. os establecementos da cidade chegou ao 80% durante o venres e superou o 90% o sábado e, segundo detallaron, algúns establecementos si que colgaron o cartel de completos.
RECOLLIDA DE RESIDUOS E REDES SOCIAIS
Un indicativo da afluencia rexistrada é a cantidade de lixo que recolleu, desde o pasado venres ao mediodía, o servizo de limpeza viaria, que este ano ascendeu a un total de 400.000 quilos de residuos, polo que superou as cifras de 2022 e 2019.
Con todo, outro dos “grandes indicadores” é o alcance das redes sociais municipais, xa que a comunidade das contas oficiais de Arde Lucus alcanzou os 47.270 usuarios nun total de cinco redes sociais.
DATA FIXA PARA A CELEBRACIÓN
O Partido Popular de Lugo pediu unha data fixa para a celebración desta festividade. Así, o concelleiro popular, Agustín Galego avanzou que presentarán na Comisión de cultura unha iniciativa para que “a partir do Arde Lucus de 2024 a celebración se desenvolva nunha data fixa que non coincida co San Xoán”.
