A alcaldesa de Lugo, Lara Méndez, supervisou este luns o inicio dos traballos para habilitar 340 novas prazas de estacionamento gratuíto na contorna do Hospital Universitario Lucus Augusti (HULA).
Segundo informou o Concello nun comunicado, a actuación, que terá un prazo de catro meses, adxudicada á empresa Escavacións J. Carreira, suporá un investimento municipal de 156.902 euros. Méndez sinalou que con isto se busca atender ás “demandas dos veciños” que ven “elevadas as tarifas do aparcadoiro subterráneo”.
O recinto ocupará dúas parcelas que no seu conxunto suman 11.510 metros cadrados con capacidade para máis de 300 vehículos. A nova área de estacionamento contará con dous accesos.
Así, haberá unha entrada ao recinto polo extremo norte, a partir da vía asfaltada, con filas dobres de aparcadoiro en batería paralelas á rúa Doutor Ulises Romeu, no caso do predio da dereita. No lado esquerdo, optaron por distribuír as prazas de forma paralela ao camiño de acceso.
