Un veciño de Lugo foi denunciado tras ser atacado polo seu propio can, de raza perigosa, do que non tiña licenza municipal preceptiva para a súa tenencia, non estaba inscrito no Rexistro municipal e non levaba ao animal coa boceira regulamentaria.
Segundo informou a Policía de Lugo, os feitos ocorreron o pasado luns cando o 092 recibiu unha chamada na que se informada do ataque dun can a unha persoa nas inmediacións do cemiterio municipal.
Os axentes desprazáronse ata o lugar e localizaron á persoa agredida no interior do seu vehículo, con sangue nos brazos e pernas, polo que solicitaron a presenza dunha ambulancia, que posteriormente trasladou ao ferido a un centro sanitario.
O animal, de raza Staffordshire Terrier, foi localizado xunto a porta de acceso ao cemiterio e presentaba restos de sangue no peito, fuciño e extremidades, polo que requiriron ao Servizo de Lacería, que se fixo cargo do animal e trasladouno ás súas instalacións, onde está en corentena.
Tras as investigacións oportunas, os policías puideron identificar o animal mediante o microchip, do que resultou ser propietario o home agredido. Así, constaba que tiña subscrito o seguro de responsabilidade civil obrigatorio, aínda que o seu titular, que o estaba paseando no momento da agresión, carece de licenza municipal preceptiva para a súa tenencia e tampouco estaba inscrito no Rexistro Municipal, como obriga a norma.
Ante isto, os axentes confeccionaron as actas-denuncias correspondentes, ademais doutra por levar ao animal pola vía pública sen facer uso da boceira regulamentaria.
