Esta tarde un guindastre cun brazo de 41 metros comezou a derrubar as torres do edificio do Garañón en Lugo. A alcaldesa en funcións de Lugo, Lara Méndez, cualificou esta xornada de “histórica” e sinalou que “aos poucos, antes de agosto” poderase ver como cambia a paisaxe desa zona da cidade á desaparición dos esqueletos do inmoble.
Así, sinalou que esas accións darán paso a “un novo pulmón verde” que dará continuidade ao Parque de Rosalía e ás costas do parque. Este edificio leva paralizado máis dunha década, na que deu orixe a unha polémica xudicial e política que mantivo no foco ao exalcalde José López Orozco e a José Ramón Gómez Besteiro, a través das imputacións por suposta prevaricación relacionada coa licenza deste edificio.
Con todo, en 2021 a Audiencia Provincial de Lugo arquivou este caso e exonerou de responsabilidade a ambos os dirixentes socialistas nun auto no que se indicaba que “non existían indicios da comisión de delitos”.
