As protestas na cuarta xornada de folga no sector do metal de Lugo céntranse este mércores na asociación provincial de reparación e venda de automóbiles e recambios (Aprevar), “a única que está a manter o pulso”, en palabras do portavoz de CC.OO. José Luís López.
Nunha xornada na que a participación, segundo López, continuou “en aumento”, de modo que permitiu configurar tres piquetes informativos, na cidade non se ve “nin un só centro de traballo aberto”. En concreto, os piquetes distribúense polo polígono das Gándaras, a estrada N-6 e o polígono de O Ceao, co obxectivo de situar o “acto central” ás 12,30 horas, precisamente, fronte á sede de Aprevar, a patronal de talleres.
Segundo denuncia o representante de CC.OO. da área do metal de Lugo, o seu responsable, Luis Abelleira, “non aparece nin dá a cara” na mesa de negociación, onde ten unha representación de en torno ao 50%, debido a que os seus asociados son tanto os concesionarios oficiais como talleres de vehículos, maquinaria agrícola, etcétera.
“Ao principio, a barreira era Recambios Frain, agora queda Aprevar”, constata, en relación á posición contraria que atribúe a Abelleira para recoñecer o “IPC real” de anos pasados que esixen os traballadores. Este punto, de feito, é o que mantén bloqueadas as negociacións para renovar o convenio.
“SUFRINDO As CONSECUENCIAS”
Para José Luís López, esta actitude “é un sinsentido”, posto que, aínda que el como presidente da asociación non se ve afectado, “os seus asociados están a sufrir as consecuencias” da folga.
Despois desta cuarta xornada, aínda hai convocados novos días de folga este venres 2 de xuño e os días 6, 7 e 8, e os sindicatos avisan de que o seguinte paso é o paro de carácter indefinido.
