Os sindicatos CSIF, UGT, CC.OO. SIBGAL e CIG convocaron folga indefinida no Consorcio de Bombeiros de Lugo a partir do 9 de xuño, para denunciar as “condicións de precariedade” nas que traballa este colectivo.
O comité de folga explicou nun comunicado que esta medida de protesta “chega tras unha suma de incidencias que puxeron especialmente en evidencia o déficit, tanto de material como de persoal, co que está a traballar este colectivo”.
Así, a CSIF advertiron de que esta situación non só prexudica ao propio persoal, “senón tamén á cidadanía”, porque “precariza o servizo que presta”.
Os sindicatos trasladaron que “debido á situación de estancamento na negociación do convenio propio, e ante a imposibilidade de resolver a situación de modo negociado”, os representantes do persoal, tras unha asemblea celebrada o fin de semana na que houbo unanimidade, anunciaron a convocatoria da folga.
As centrais lamentaron a “pasividade da Administración” a pesar das medidas de presión levadas a cabo, como a manifestación de hai dúas semanas en Lugo, e advertiron de que “urxe a adopción de medidas que dean unha pronta solución ao déficit de medios materiais e humanos”.
