O presidente da Deputación de Lugo, José Tome, e o secretario xeral para o Reto Demográfico, Francesc Boya, visitaron este martes a leira do Pazo de Tor, en Monforte de Lemos, na que, segundo destacou a institución provincial, buscarán pór en valor esta propiedade e darlle unha nova utilidade no futuro.
Así, Tomei explicou que analizaron as posibilidades de establecer o futuro da leira, propiedade da Deputación, e para pola en valor co fin de que “sexa útil como un ben público e tamén sirva para dinamizar os sectores produtivos, especialmente o sector primario”.
Pola súa banda, o secretario xeral destacou na súa visita o interese do seu departamento en coñecer de primeira man “como articulan as cidades medias, como pode ser Monforte, o territorio, os servizos e o rural”. “Un modelo que queremos para o conxunto do país e para loitar así contra o despoboamento. Por primeira vez hai unha política de Estado. A solución é reter talento e configurar polos industriais con capacidade de ofrecer calidade de vida e oportunidades laborais”, subliñou secretario.
