A portavoz nacional do BNG, Ana Pontón, proclamou que o candidato da súa formación á Alcaldía de Lugo, Rubén Arroxo, será o próximo alcalde da cidade porque “o Bloque foi o seu verdadeiro motor de transformación”. A líder dos nacionalistas galegos visitou este luns xunto a Rubén Arroxo o barrio da Tinería, unha zona que considerou “un exemplo de como o PP dinamitou a política de vivenda protexida e de discriminación coa cidade”.
Nun contexto no que “a crise de prezos é unha das principais preocupacións da cidadanía e cando o prezo do aluguer nas cidades subiu de media un 30% nos últimos anos”, Pontón censurou que o Goberno do PP “dinamitase a política de vivenda protexida” e que “en 14 anos non movese un dedo para seguir co proceso de rehabilitación e recuperación”.
A líder do Bloque explicou que, de estar rehabilitadas, esas vivendas poderían porse a disposición da xente nova e das familias con menos recursos en réxime de aluguer a prezos asumibles para as rendas medias e baixas. “Iso foi exactamente o que fixo exactamente o que fixo o BNG cando tivo responsabilidades de Goberno”, lembrou para indicar que “o Goberno do PP leva anos dándolle as costas a Lugo e ignorando a recuperación dun barrio que é fundamental para esta cidade”.
A portavoz nacional manifestou tamén a súa desconformidade con que “por puro partidismo, o Goberno do PP teña no máis absoluto abandono ao barrio da Tinería, a rehabilitación das vivendas e a recuperación do espazo público”. “O Executivo do señor Rueda non está a discriminar e abandonado ao BNG, senón a todos os veciños e veciñas de Lugo, moi en particular aos que viven nesta parte da cidade”, sostivo.
“OUTRO LUGO É POSIBLE CO BNG”
Ademais, Pontón mostrouse convencida de que “como resposta a este agravio e a esta discriminación”, a cidadanía vai dar unha resposta contundente nas urnas o próximo 28 de maio, apostando polo BNG e por Rubén Arroxo como alcalde para facer que Lugo progrese e avance”.
Arroxo, pola súa banda, lembrou que o da Tinería é “un dos barrios máis antigos de Lugo, e un dos poucos do mundo que ten tres patrimonios da humanidade”. Así, explicou como, anos atrás, fíxose un investimento moi importante, coa recuperación de restos arqueolóxicos ou a rehabilitación do Pazo de Doa Urraca, con máis de mil anos de antigüidade.
“A pesar de todo ese traballo, coa chegada do PP á o Xunta chegou tamén a parálise que impediu que este barrio estea hoxe en día rehabilitado”, lamentou o candidato, que asegurou que se a partir do 28 de maio é alcalde de Lugo unha das súas primeiras actuacións será pedir unha reunión con Rueda para solicitarlle que termine os proxectos pendentes. “E, se non, xa o fará a próxima presidenta”, declarou Arroxo.
