A visita do presidente do Goberno e líder do Partido Socialista, Pedro Sánchez, prevista para este mércores a Lugo, onde ía participar nun acto de precampaña, foi cancelada. Segundo informaron fontes do PSdeG a Europa Press, o motivo é a inminente viaxe de Pedro Sánchez a Estados Unidos.

En concreto, estaba previsto que o líder dos socialistas participase, na Praza de Santa María, nun acto electoral de precampaña coa alcaldesa de Lugo, Lara Méndez. Con todo, tal e como sinalaron estas fontes, a preparación da viaxe aos Estados Unidos, onde está previsto que Sánchez se reúna co presidente Joe Biden, motivou que a cita de Lugo quedara fóra da axenda.

Os socialistas programaran a visita do líder do PSOE a Lugo nun contexto no que o PSdeG reforza os actos naquelas localidades nas que considera que necesita mobilizar ao seu electorado de cara ao 28 de maio, como é o caso das cidades de Lugo e de Santiago de Compostela. Nos últimos días, estas foron visitadas pola ministra portavoz, Isabel Rodríguez, nunha semana na que tamén estivo en Galicia o responsable de Exteriores, José Manuel Albares. Ademais, o PSdeG prevé que esta semana visite Galicia a vicepresidenta Nadia Calviño.