O Xulgado do Contencioso-administrativo número 2 de Lugo eximiu ao Concello de Lugo de abonar a indemnización de 15,4 millóns de euros que reclamaban o promotor do edificio do Garañón pola decisión do goberno local de paralizar en 2011 a construción do inmoble.
A sentenza emitida este mesmo xoves e contra a que cabe recurso de apelación ante o Tribunal Superior de Xustiza de Galicia (TSXG) desestima o recurso presentado polo promotor de O Garañón en xullo de 2013, no que pedía o reconcimiento do dereito a percibir unha compensación millonaria.
O maxistrado titular do xulgado lugués determina na súa resolución que en 2011, momento no que o consistorio paralizou a construción do inmoble, non concorría “un dano efectivo, avaliable economicamente e individualizado”.
Deste xeito, considera que o que ocorreu “nese momento, non posteriormente” debe “incardinarse dentro das marxes do razoable, non sendo a primeira, nin única vez, que ha de retrotraerse un procedemento administrativo por falta dun informe”.
O xuíz entende que da análise da situación urbanística no momento da paralización das obras ou o estado de execución do convenio para levantar O Garañón extráese que non houbo un incumprimento deste acordo asinado en 2005 pola administración municipal.
Argumenta que a paralización se baseou nunha “retroacción do procedemento administrativo” para solicitar un informe á Consellería de Cultura que resultou negativo ao valorar a protección do sanatorio Portela e Termas Romanas e do Parque Rosalía de Castro, este último dentro do plan urbanístico de 2011 que foi publicado un ano máis tarde.
LARA MÉNDEZ CELEBRA A DECISIÓN
En declaracións difundidas aos medios tras coñecerse a decisión xudicial, a alcaldesa de Lugo, Lara Méndez, mostrou a súa satisfacción pola sentenza “favorable para o concello e, por tanto, para a cidadanía”.
A rexedora socialista lembrou que o seu predecesor no cargo, José López Orozco, e o actual delegado do Goberno en Galicia, José Ramón Gómez Besteiro, “sufriron un calvario” nos xulgados polo caso O Garañón. “Hoxe vemos que a realidade é testaruda”, ha añdido Méndez, que afirmou que se trata dun “día importante” para o goberno municipal despois de anos de “pelexa e loita” nos que, di, estiveron “sós”.
“En Lugo sábese como se entra nos xulgados, moitas veces, desgraciadamente con anónimos e papelitos”, aseverou Méndez en alusión aos anónimos relacionados coa candidata á Alcaldía de Lugo polo PP, Elena Candia, que motivaron a apertura de investigacións xudiciais contra Besteiro, finalmente arquivadas.
