Unha decisión xudicial, por mor dun recurso do promotor, paralizou ata que se resolvan as medidas cautelares a execución da derriba das torres de O Garañón, en Lugo. A alcaldesa da cidade, Lara Méndez, ratificou este martes que a decisión xudicial prodúcese por mor dun recurso do promotor e que, “como sucedeu cando o fixo Banco Santander, mentres non se resolva, hai esas medidas cautelares”.

En todo caso, a rexedora manifestou que espera que “poida ser cuestión de días”. “Esperemos que se resolva como a vez anterior e podamos seguir co gran obxectivo que é demoler O Garañón”, recalcou. Precisamente, a alcaldesa, o concelleiro de Urbanismo, Álvaro Santos, e un representante da empresa que derrubará O Garañón entraron o pasado venres, 21 de abril, na leira para asinar a acta de reformulo da demolición e inicio de obra, que podería comezar nas próximas semanas.

“UNHA CHAPUZA”

Pola súa banda, o PP local emitiu un comunicado no que sitúa o anuncio da paralización da derriba como “un capítulo máis dunha chapuza e dun engano sen precedentes” aos lucenses por parte do goberno local, ao que atribúe o “ridículo máis absoluto” tras montar “un teatrillo”.

Para os populares, a derriba de O Garañón “non é ningún éxito” porque “a licenza dada por (José Ramón Gómez) Besteiro e os seus compañeiros de corporación do PSOE está a custar, ademais de moitos desgustos, moito diñeiro” aos veciños da cidade da muralla.

En concreto, esgrimen que, ademais “dos 600.000 euros” que custará a derriba das torres, estímase que unha vez que se tiren os edificios haberá que pagar “máis de 200 euros por cabeza en concepto de indemnización ao promotor, que pide máis de 20 millóns pola licenza ilegal que lle deu o PSOE”.

“É unha desgraza para Lugo que o señor Besteiro dese a licenza das torres de O Garañón o último día do ano, en fin de semana, cando ao día seguinte entraba en vigor a lei do chan que reduciría a edificabilidade e rendibilidade á operación urbanística”, censuran os populares.