A Garda Civil investiga por un delito de condución temeraria unha muller de 81 anos de idade, veciña de Vilalba, que este venres circulou uns catro quilómetros en sentido contrario pola A-6 ao seu paso polo termo municipal de Lugo, aínda que non ocasionou ningún accidente.

Segundo informa o Instituto Armado, eran as 12,30 horas de mediodía cando o 112 alertou sobre un turismo que ía en sentido A Coruña polos carrís reservados para facelo cara a Madrid. Desta forma, as patrullas en servizo dirixíronse ao lugar e localizaron o coche no punto quilométrico 501 da citada vía.

A Garda Civil asegurou a seguridade da zona e prestou auxilio á condutora, que resultou ser unha muller de 81 anos que deu negativo nas probas de alcol e drogas. O Instituto Armado lembra que o vixente Código Penal establece condenas de cando menos seis meses de cárcere para o delito de condución temeraria.