Veciños de seis concellos da provincia de Lugo participarán esta semana no programa ‘Coñece a túa provincia’, da deputación de Lugo, que percorre o territorio lucense para fomentar o turismo de proximidade. En concreto, trátase de preto de 140 persoas dos municipios de Outeiro de Rei, Riotorto, Foz, Pol, Samos e Ribas de Sil.
O mércores, a Asociación Sociocultural e Veciñal A Costoña de Vicinte, de Outeiro de Rei, e a de Pais de alumnos do CEIP de Riotorto, viaxaron ata á Mariña e á Ribeira Sacra. Os primeiros comezaron a súa ruta no Pazo de San Marcos, onde o grupo foi recibido por Pablo Rivera, Deputado de Promoción Económica e Social, antes de continuar cara a Trabada, onde visitan o Museo Etnográfico José Rocha, A Pontenova e o Mazo dá Fraga en Ferreiravella, en Riotorto.
Doutra banda, o outro grupo partiu da Granxa Gayoso Castro da institución provincial, onde foron saudados polo Deputado responsable desta área, Roberto Fernández Rico. Posteriormente, puxeron rumbo á Ribeira Sacra, onde realizaron un itinerario cunha visita a unha igrexa románica en Sober e un miradoiro, e un percorrido en catamarán polo Canón do Sil, desde Monforte de Lemos.
O xoves será protagonista de novo a Ribeira Sacra e a montaña. Escolares do Colexio Fundación Martínez Otero, de Foz, desprazaranse ata Sober e Monforte de Lemos despois de coñecer os segredos do mundo televisivo na Produtora de Audiovisuais da institución. Aos concellos da Fonsagrada e Negueira de Muñiz viaxarán mulleres da Asociación Rurais Esquecemento, de Pol, tras coñecer a historia do Pazo de San Marcos.
Para finalizar a semana, o venres, a Asociación de Comerciantes e Artesáns de Samos partirán do Mazo de Santa Comba para realizar na Mariña a ruta polos concellos de Trabada, A Pontenova e Riortorto. Tamén á costa lucense, neste caso aos concellos do Valadouro e Alfoz, viaxarán os membros do Centro de Animación Rural Remansiño do SIL-SAN CL, de Ribas de Sil, que sairán do Centro de Interpretación Terras do Miño.
