A alcaldesa de Lugo, Lara Méndez, presentou este martes a terceira das empresas que contará con financiamento da Estratexia Lugo Transforma, articulada durante a pandemia para favorecer a diversificación industrial e crear emprego estable e de calidade no municipio.

En concreto, serán a tecnolóxica InVerbis Analytics, que recibirá 400.000 euros deste fondo para apontoar o seu fortalecemento e cuadriplicar o seu cadro de persoal.

InVerbis, lembrou Lara Méndez, “naceu como un proceso de incubación e transferencia tecnolóxica desde CiTiUS, o Centro Singular de Investigación de Tecnoloxías Intelixentes da Universidade de Santiago de Compostela” no ano 2020, “coa vontade de introducir no mercado vantaxes para as empresas encamiñadas a xerar importantes aforros de xestión, automatizar as súas operacións de maneira rápida e efectiva e facilitar os procesos de certificación”.

“Hoxe, case tres anos despois, os seus algoritmos están á vangarda internacional, ofrecendo a que xa se considera a ferramenta de minaría de procesos máis flexible que existe neste momento”, engadiu a rexedora.

Na actualidade, a compañía está formada por 14 persoas, entre as que figuran dous doutores de física, un doutor en enxeñaría de computación e dous enxeñeiros industriais con posgraos en big data e intelixencia artificial. A previsión é a de cuadriplicar o persoal ata 2025, creando 38 novos postos de traballo para os que botarán man de perfís saídos directamente dos graos dos que dispón a USC en Administración de Empresas, Mercadotecnia, Publicidade, Avogacía, Relacións Laborais e Empresa e Tecnoloxía.

Gonzalo Martín, Alejandro Ramos e Sonia Martínez –CEO, director científico e responsable de dirección e administración da empresa, respectivamente– puxeron de manifesto que, actualmente, reciben “moitas máis chamadas desde o extrajero que desde españa”, polo que este investimento servirá para aproveitar as oportunidades que se presentan no ámbito da loxística, administración pública, banca, xestión hospitalaria e industria do automóbil.

Pola súa banda, Jesús Torres, de Torsa Capital, destacou o potencial de InVerbis, que “está a conseguir situarse como marca no sector” e que ten unha “gran fortaleza no equipo executivo que acumula anos de experiencia en xestión empresarial, desenvolvemento do negocio e tecnoloxía da información, así como no consello científico asesor que os acompaña con experiencia en tecnoloxías intelixentes ou aprendizaxe automática”.