O PP ten a mirada posta na Deputación de Lugo de cara ás eleccións locais do 28 de maio. O vicesecretario de Organización da dirección nacional do partido, Miguel Tellado, proclamou este mércores que “o sectarismo” da institución provincial, actualmente en man de PSOE e BNG, ten que “quedar atrás” para dar paso a “un goberno que non mire a cor política de cada concello, senón que atenda e cubra as necesidades dos veciños”.
Tellado visitou a provincia –Samos e a capital– acompañado da secretaria xeral do PPdeG, Paula Prado, e en senllas declaracións aos medios mostrouse “seguro” de que os populares ampliarán a súa representación nas institucións locais e conseguirán máis gobernos.
Nun primeiro momento, o vicesecretario de Organización de ‘Xénova’ reuniuse con varios candidatos da comarca de Sarria, entre eles o de Samos, Miguel Gallego, quen hai semanas tivo especial transcendencia por ser o fillo do actual rexedor, Julio Gallego, que gobernaba baixo as siglas do PSdeG-PSOE.
VOTANTES QUE “NON SE IDENTIFICAN” CO PSOE
Tellado avalou ao candidato en Samos e puxo este caso como exemplo de que “cada vez hai máis” socialistas e votantes “que non se identifican” co PSOE de Pedro Sánchez, que agora “é o ‘Partido Sanchista'”.
Paula Prado, ‘número dous’ do PPdeG, vaticinou que Gallego será “un magnífico alcalde” porque xa é un “referente” para a xente nova. De feito, é un dos candidatos de menos idade que teñen os populares en Galicia.
RESPALDO A ELENA CANDIA
Horas despois, o vicesecretario do PP desprazouse á capital provincial para participar, xunto con Prado e a candidata á Alcaldía, Elena Candia, nun encontro con novos afiliados na sede do partido. Tellado mostrou o seu respaldo a Candia, quen precisamente nos últimos días estivo no foco mediático ao confirmarse que en 2013 entregou á Fiscalía uns anónimos que propiciaron unha investigación xudicial –xa arquivada— contra o entón presidente da Deputación de Lugo e líder do PSdeG, José Ramón Gómez Besteiro.
Elena Candia é, segundo incidiu o vicesecretario de Organización de ‘Xénova’, a “mellor candidata posible” porque “atesoura experiencia de xestión, ganas e ilusión” por darlle á cidade “un futuro mellor”.
