O presidente da Deputación de Lugo, José Tomé Roca, xunto ao alcalde de Castroverde, Xosé María Arias, participou este domingo na inauguración da escultura en memoria de Manuel Cordeiro Pérez, deputado republicano socialista nado na localidade lucense, en concreto, na parroquia de Riomol, que impulsou o voto feminino.
O Concello organizou este acto, impulsado pola veciña Cristina Castedo Pereira, en conmemoración do 8-M, Día Internacional da Muller. Alí, segundo trasladou a Deputación nunha nota de prensa, José Tomé destacou a importancia do traballo realizado por Cordeiro Pérez e subliñou a súa “loita pola igualdade real”. “Un feito polo que aínda hoxe seguimos loitando desde a sociedade e desde a política”, engadiu.
No acto, ao que puxo música o grupo local ‘Zuncurrundullo’, tamén participaron o escultor e creador do busto, Miguel Couto; o historiador e cronista oficial do Concello de Castroverde, Ricardo Polín; e distintos representantes locais, ademais de veciños e veciñas.
