A asociación empresarial Lugo Monumental presentou unha iniciativa a prol da convivencia coas mascotas nos locais do casco histórico. A campaña consta de tres accións, sendo a máis notoria a creación dun distintivo para aqueles establecementos que permiten o acceso de animais. Os negocios que conten co indicativo favorable, de cor verde, quedarán recollidos nunha guía. A patronal presentou asemade un decálogo cívico.

“Moitas veces os propietarios dunha mascota non sabemos se podemos entrar a un local, é violento preguntar”, comentaba o presidente da asociación, Luis Latorre. “É mellor ter unha indicación directa”, en referencia ao distintivo que poderán dispor os establecementos comerciais da zona vella. O indicativo é unha pegada de can, de cor verde no caso de permitir o acceso, vermella para os que impiden o paso de mascotas.

O máximo responsable de Lugo Monumental indicou que a Lei de Protección e Benestar Animal de Galicia unicamente prohíbe a presenza de mascotas onde se elaboren alimentos, con excepción do sector hostaleiro, onde se reserva a cada negocio esta potestade. Así, Latorre animou a quen ten dúbidas a que deixe entrar aos animais, para primeiro comprobar se existe algún inconvinte.

Dende a asociación empresarial xustifican a iniciativa polo fomento da convivencia. O indicativo homologado e a guía de comercios facilitarán, aseguran, a relación cotidiana entre propietarios e mascotas, e esperan que esta circunstancia favorable incremente as posibilidades de adoptar animais.

De igual xeito pronunciouse a presidenta de la Asociación Protectora de Animais de Lugo, Ángeles López Pardo, que pediu “responsabilidade aos donos”. Valorando o decálogo de boas prácticas, lembrou que “o civismo ten que partir primeiro de nós”, e convidou a ter en conta o carácter das mascotas e coidar as súas condicións.