Efectivos da Policía Local de Lugo intensificaron a pasada madrugada os controis de alcol e drogas ao volante, un dispositivo que se saldou con tres alcoholemias positivas e un positivo por drogas.

En concreto, interceptouse a un vehículo que circulaba en zigzag pola rúa río Sil e cuxo condutor presentaba evidentes signos de embriaguez. Deu positivo na proba, con 0,84 mg/l, polo que se instruíron dilixencias por delito contra a seguridade viaria.

Ademais, foi detectado outro condutor que circulaba con 0,45 mg/l de alcol en sangue pola praza de Fonte dos Ranchos e outro con 35 mg/l de alcol en sangue pola rúa Armórica.

Na mesma vía, a rúa Armórica, os axentes deron o alto a un vehículo que circulaba de forma irregular e cuxo condutor deu positivo en cocaína, THC e metanfetaminas.