A asociación do transporte de Lugo Aetram ameazou este mércores con mobilizacións se, finalmente, non se mantén a bonificación de 20 céntimos ao combustible máis aló da prórroga do Goberno ata o 30 de xuño.

O presidente, Diego Arias, avanzou que, sen esa axuda, “sería inviable” sobrevivir e deixou caer que “no caso de que a quiten” farán “algo”.

Previamente, o líder de Aetram advertiu dunha “subida importante” do gasóleo nas próximas semanas, que vinculou con “o conflito por Rusia”. “E xa están bastante caros os combustibles como para que teñan que subir máis”, engadiu.

Arias dixo que coa bonificación “como está agora” os transportistas están ao límite, polo que “se sobe moito máis non vai ser suficiente”.

“No caso de que nolas retiren (as axudas), teremos que facer algo, porque senón é inviable, insisto”, reiterou Diego Arias, que calculou en 1.000 euros o aforro mensual que esta bonificación supón para un vehículo media de transporte con ruta nacional.