Os dous homes considerados autores do intento de atraco á xoiaría do Corte Inglés da Coruña e de roubo nun Burger King no centro comercial das Termas, en Lugo, foron detidos en Baralla, provincia de Lugo, segundo confirmaron fontes consultadas por Europa Press.

A súa detención produciuse despois de que a última hora do martes, e antes do peche do establecemento, tentasen roubar na xoiaría do Corte Inglés, da cidade herculina.

Para iso, fixeron uso dun extintor co obxectivo de xerar unha nube de po e poder subtraer xoias destes grandes almacéns coruñeses. Os homes non o lograron e dous vixiantes, que impediron o roubo, resultaron feridos.

Logo déronse á fuga nun coche roubado. Tras este suceso, perpetraron un roubo no Burger King das Termas, en Lugo, fuxindo e sendo perseguidos por efectivos das Forzas e Corpos de Seguridade do Estado.

Xa na localidade lucense de Baralla tiveron un accidente polo que continuaron a fuxida a pé para ser, segundo confirmaron as fontes consultadas, finalmente detidos.