O Concello de Lugo habilitou un dispositivo especial para garantir a seguridade dos peóns e dos vehículos en todo o municipio ante as previsións meteorolóxicas que advirten nas próximas horas dunha alerta amarela por precipitacións en forma de neve con acumulacións de ata catro centímetros nunha cota inferior a 300-500 metros.
Así, sinalou que tanto a concellaría de Medio Ambiente, que dirixe Miguel Fernández, como os servizos de Policía Local, Bombeiros e Protección Civil mantéñense vixiantes para atender calquera incidencia que poida xurdir.
Así, o Concello detallou que dispón da provisión de cinco toneladas de sal e de diversos medios mecánicos entre os que se atopan cinco esparcidoras, unha sobre camión para botala na calzada e catro carros para beirarrúas, así como tres coitelas quitaneves, unha sobre camión para estradas e outras dúas sobre varredoras. Ademais, tamén conta con dous tractores con pa.
Neste contexto, o Goberno local fixo un chamamento á cidadanía, á que recomenda extremar as precaucións en todo tipo de desprazamentos e pide que se evite correr riscos innecesarios para non incorrer en situacións de perigo.
