Axentes do grupo de menores da xefatura provincial da Policía Autonómica en Lugo levaron a cabo, entre o 26 e o 30 de decembro de 2022, varias inspeccións en locais comerciais de concellos da provincia lucense, no marco dun dispositivo de control de venda de produtos de tabaco.

Segundo informou a Xunta de Galicia nun comunicado remitido aos medios de comunicación este martes, a Policía Autonómica realizou os controis despois de ter coñecemento por parte da xefatura territorial da Consellería de Sanidade en Lugo da posible venda a menores de produtos de tabaco, tales como vapeadores e cigarros electrónicos.

Como resultado das inspeccións, os axentes levantaron 3 actas de infracción polo incumprimento da Lei 28/2005, do 26 de decembro e polo Real Decreto 17/2017, de 17 de novembro, de medidas sanitarias fronte ao tabaquismo e reguladora de venda, subministración, consumo e publicidade dos produtos do tabaco.

A Policía Autonómica tamén efectúa intervencións preventivas nas concentracións de mozas nas vías públicas para controlar e evitar o consumo ilícito de tabaco.