A alcaldesa de Lugo, Lara Méndez, acordou este venres a prerrogativa á hostalaría para manter as terrazas nos seus emprazamentos actuais. Esta medida terá carácter extraordinario e temporal.
Segundo sinalou o Concello nun comunicado, a nova Ordenanza municipal publicarase nos próximos días para dar oficialidade a esta decisión.
A rexedora sinalou que esta decisión é unha “prioridade”, xa que “garante a viabilidade dun sector crucial para o PIB local que sustenta as economías de numerosas familias da cidade”.
Deste xeito, Méndez avanzou que xa está a organizar coa Policía Local os operativos de vixilancia e control que se porán en marcha a partir de 1 de xaneiro para supervisar que se están acatando as delimitacións establecidas nas terrazas. “É indubidable que as tendencias do consumo no exterior dos locais viñeron para quedar”, explicou.
Así, insistiu en que a medida se manterá ata que entre en vigor a Ordenanza que regulará a configuración estética deste tipo de instalacións, “cuxo borrador está xa moi avanzado e ao que esperamos poder incorporar en breve ás suxestións e achegas que realice o sector”.
