Máis de seis mil persoas acudiron esta semana, o martes, ao Banco de Alimentos, o que provoca que se resinta polas reservas de cara ao futuro máis inmediato. A presidenta do Banco de Alimentos, Amadora Núñez, constatou que foi unha constante o de que vaia “moitísima xente”, mesmo se atreve a destacar que foi “incrible”.

“Non sei que vai pasar. O martes houbo xente, voluntarios esporádicos e unha desas voluntarias saíu de alí chorando”, expuxo sobre esa masiva presenza que se podería repetier este venres, neses dous días á semana que abre.

Tanto é así que calcula que foron “ao redor do seis mil persoas”, nas dúas sedes con que conta este banco, na cidade de Lugo e tamén na Mariña. “Foron en torno, ou máis de seis mil persoas, o que, desde logo, é unha auténtica barbaridade. Unha verdadeira animalada”, lamentou Amadora Núñez.

En canto a reservas de alimentos, puntualizou que “de momento hai”, aínda que recoñeceu que a este “ritmo pódense acabar” enbreve. “Eu pídolle á xente que bote unha man, non xa para exquisiteces, senón para contar con arroz, pasta ou fariña“, reivindicou, e non tanto leite “porque as empresas lácteas están a envorcarse”, agradeceu.

E esta avalancha de persoas atribúea á inflación “desbocada” e así expuxo que “cos prezos que teñen nos supermercados, é unha auténtica burrada”. Dispáranse as cifras en canto a demandantes de alimentos, por canto o Banco de Lugo adoitaba atender a un dous mil persoas nas dúas sedes con que conta.