A Xunta de Goberno da Deputación de Lugo aprobou este xoves as bases para poder lanzar en 2023 a terceira edición do programa de viaxes gratuítas ‘Coñece a túa provincia’.
A portavoz socialista do Goberno, Pilar García Porto, sinalou que a institución provincial prepara unha nova convocatoria “ante o enorme éxito que tiveron as dúas edicións anteriores, nas que participaron máis de 4.500 persoas”.
Este programa diríxese a asociacións e colectivos sen ánimo de lucro de toda a provincia e consiste en viaxes gratuítas, en pequenos grupos, dun día de duración, por diferentes puntos da xeografía lucense seguindo diversas rutas polo patrimonio natural, histórico, cultural e gastronómico.
Nas bases aprobadas para a edición de 2023 recóllese que a Deputación ofertará un máximo de 3.036 prazas repartidas en dous períodos: un na primavera, entre marzo e xuño (con 1.794 prazas), e outro no outono, entre setembro e decembro (1.242 prazas).
O prazo para presentar as solicitudes será de 15 días naturais contados a partir do día seguinte á publicación das bases reguladoras da convocatoria no Boletín Oficial da Provincia.
CONVENIOS DE COLABORACIÓN E PLAN ÚNICO
Doutra banda, a Xunta de Goberno tamén aprobou seis convenios de colaboración con diferentes municipios e entidades da provincia por un importe conxunto de case de 340.000 euros e que axudarán a dotar de máis e mellores servizos aos veciños da provincia.
No que respecta ao Plan Único, aprobouse a solicitude do Concello de Barreiros de destinar remanentes do Plan Único de 2022 por un importe de 21.500 euros para unha nova actuación, que consiste na pavimentación de accesos entre a escola de Vilamartín Pequeno e Currás.
Outro dos asuntos aprobados foi a prorrogación durante 2023 o encargo da Deputación de Lugo á empresa pública Tragsa, que é medio propio da institución, para o mantemento das zonas verdes de titularidade provincial. O importe do encargo de xaneiro a decembro de 2023 é de 850.000 euros.
