O titular da Xunta e presidente do Partido Popular de Galicia, Alfonso Rueda, reivindicou este mércores que a candidatura á Alcaldía de Elena Candia representa á “maioría de lucenses que queren un Lugo mellor”. “Cada vez son máis os que a escollen para abrir unha nova etapa de futuro na cidade”, proclamou.
Así o trasladou ante os presentes no petisco de nadal organizado polo PP de Lugo, ao que cualificou como “a casa onde caben todos os que queren un Lugo máis amable, con máis calidade de vida, con máis seguridade nos barrios, con futuro e capaz de xerar emprego e de apoiar ás familias”.
O líder dos populares galegos aseverou que “xa é hora de que Lugo teña o primeiro goberno non de esquerdas no que vai do século XXI” e, por iso, augurou que o próximo 28 de maio será “a cita cun cambio histórico”.
E agregou, dirixíndose especificamente a Elena Candia: “Tes unha cita coa ilusión, coa ansia de cambio e as expectativas que estás a xerar entre todos os lucenses”.
“Elena puido optar pola opción máis segura, pero elixiu Lugo”, asegurou, á vez que puña en valor que o PP “defende a Lugo por encima das siglas”; citando como exemplos as reivindicacións dun tren “digno” para a provincia e a demanda de axilización dos fondos europeos para blindar proxectos como o de Altri.